ﺋﺎﯞﻏﯘﺳﺖ ﺋﯧﻴﻰ ﺋﯩﭽﯩﺪﻩ ﺋﯘﻳﻐﯘﺭ ﺩﯨﻴﺎﺭﯨﺪﺍ ﻳﯜﺯ ﺑﻪﺭﮔﻪﻥ ﯞﻩﻗﻪﻟﻪﺭ ﺩﯗﻧﻴﺎ ﻣﻪﺗﺒﯘﺋﺎﺗﻠﯩﺮﯨﻨﯩﯔ ﺩﯨﻘﻘﻪﺕ ﺋﯩﺘﯩﺒﺎﺭﯨﻨﻰ ﻗﻮﺯﻏﯩﻐﺎﻥ ﺋﯩﺪﻯ. ﯞﻩﻗﻪ ﺋﺎﺯﻩﺭﺑﻪﻳﺠﺎﻧﺪﯨﻜﻰ ﻣﻪﺗﺒﯘﺋﺎﺗﻼﺭﺩﯨﻤﯘ ﻛﻪﯓ ﻛﯚﻟﻪﻣﺪﻩ ﻳﻪﺭ ﺋﺎﻟﻐﺎﻥ.
ﻣﯘﻧﺎﺳﯩﯟﻩﺕ ﺑﯩﻠﻪﻥ ﺋﺎﺯﻩﺭﺑﻪﻳﺠﺎﻧﺪﯨﻜﻰ ﺗﯜﺭﻛﯩﺴﺘﺎﻥ ﮔﯧﺰﯨﺘﯩﻨﯩﯔ 30 - ﺋﺎﯞﻏﯘﺳﺖ ﻛﯜﻧﯩﺪﯨﻜﻰ ﺳﺎﻧﯩﺪﺍ " ﺋﻮﻟﯩﻤﭙﯩﻜﻨﯩﯔ ﺳﺎﻫﯩﭙﺨﺎﻧﻰ ﺧﯩﺘﺎﻱ ﺋﯘﻳﻐﯘﺭﻻﺭﻏﺎ ﺗﯘﺭﻣﻪ ﺑﻮﻟﺪﻯ" ﻣﺎﯞﺯﯗﻟﯘﻕ ﻣﺎﻗﺎﻟﻪ ﺋﯧﻼﻥ ﻗﯩﻠﯩﻨﺪﻯ. ﺑﯘ ﺗﯧﻤﯩﻨﯩﯔ ﺋﺎﺳﺘﯩﺪﯨﻜﻰ ﻛﯩﭽﯩﻚ ﺗﯧﻤﺎ ﺑﻮﻟﺴﺎ، "ﺧﯩﺘﺎﻳﻼﺭ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﻫﻪﺭ ﻛﯜﻥ ﯞﻩﻫﺸﯩﻠﯩﻚ ﻗﯩﻠﻤﺎﻗﺘﺎ، ﺩﯗﻧﻴﺎ ﺑﻮﻟﺴﺎ ﺋﯘﻥ - ﺗﯜﻧﺴﯩﺰ ﺗﯘﺭﻣﺎﻗﺘﺎ". ﺑﯘ ﻣﺎﻗﺎﻟﻪ ﺋﯘﺯﯗﻥ ﺑﯩﺮ ﻣﺎﻗﺎﻟﻪ ﺑﻮﻟﯘﭖ، ﺑﺎﻛﯘﺩﺍ ﻧﻪﺷﺮ ﻗﯩﻠﯩﻨﯩﯟﺍﺗﻘﺎﻥ ﺗﯜﺭﻛﯩﺴﺘﺎﻥ ﮔﯧﺰﯨﺘﯩﺪﻩ ﭼﺎﺗﻤﺎ ﻣﺎﻗﺎﻟﻪ ﺷﻪﻛﻠﯩﺪﻩ ﺋﯧﻼﻥ ﻗﯩﻠﯩﻨﻐﺎﻥ. ﻣﺎﻗﺎﻟﻪ ﺧﯩﺘﺎﻳﻼﺭﻧﯩﯔ ﺋﯘﻳﻐﯘﺭ ﺩﯨﻴﺎﺭﯨﺪﺍ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﯞﻩﻫﺸﯩﻠﯩﻜﯩﻨﻰ ﺋﻪﻛﺲ ﺋﻪﺗﺘﯜﺭﮔﻪﻥ ﺭﻩﺳﯩﻤﻠﻪﺭ ﺑﯩﻠﻪﻥ ﺑﯧﺰﻩﻟﮕﻪﻥ ﺑﻮﻟﯘﭖ، ﻣﺎﻗﺎﻟﻪ ﻣﯘﻧﺪﺍﻕ ﺑﺎﺷﻠﯩﻨﯩﺪﯗ: " ﺗﯜﺭﻛﯩﻲ ﻣﯩﻠﻠﻪﺗﻠﻪﺭ ﺑﯩﺮ - ﺑﯩﺮﻟﻪﭖ ﻣﯘﺳﺘﻪﻗﯩﻞ ﺑﻮﻟﻐﺎﻥ ﻛﯜﻧﯩﻤﯩﺰﺩﻩ ﺋﯚﺯ ﯞﻩﺗﯩﻨﻰ ﺗﯜﺭﻛﯩﺴﺘﺎﻧﺪﺍ ﺑﯩﺮ ﻣﯘﺳﯘﻟﻤﺎﻥ ﺗﯜﺭﻛﯩﻲ ﻣﯩﻠﻠﻪﺕ ﻗﯩﺰﯨﻞ ﺧﯩﺘﺎﻳﻨﯩﯔ ﺯﯗﻟﻤﻰ ﺋﺎﺳﺘﯩﺪﺍ ﻳﺎﺷﯩﻤﺎﻗﺘﺎ. ﺑﯘﻻﺭ ﺋﯘﻳﻐﯘﺭﻻﺭ. ﻫﻪ ﺷﯘﻧﺪﺍﻕ! ﺧﯩﺘﺎﻳﻼﺭ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﯞﻩﻫﺸﯩﻴﻠﯩﻚ ﻗﯩﻠﯩﯟﺍﺗﯩﺪﯗ. ﺋﯘﻳﻐﯘﺭ ﻗﯧﺮﯨﻨﺪﺍﺷﻠﯩﺮﯨﻤﯩﺰ ﺋﯘﻻﺭ ﭘﻪﻗﻪﺗﻼ ﻣﯘﺳﯘﻟﻤﺎﻥ ﺗﯜﺭﻛﯩﻲ ﻣﯩﻠﻠﻪﺕ ﺑﻮﻟﻐﺎﭼﻘﺎ ﻗﻪﺗﻠﻰ ﻗﯩﻠﯩﻨﯩﯟﺍﺗﯩﺪﯗ. ﻣﺎﻧﺎ ﺑﯘ ﺑﯩﺰ ﺋﯘﻧﯘﺗﻘﺎﻥ ﯞﻩﺗﻪﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ. ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻣﻪﺳﯩﻠﯩﺴﻰ ﻣﺎﻗﺎﻟﯩﺪﻩ، "ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﺧﯩﺘﺎﻱ ﻫﺎﻛﯩﻤﯩﻴﯩﺘﻰ، ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﻗﯩﺰﯨﻞ ﺧﯩﺘﺎﻱ ﻫﺎﻛﯩﻤﯩﻴﯩﺘﻰ، ﺧﯩﺘﺎﻳﻨﯩﯔ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﯨﻜﻰ ﺋﺎﺳﺴﯩﻤﯩﻠﯩﻴﺎﺗﺴﯩﻴﻪ ﺳﯩﻴﺎﺳﯩﺘﻰ، ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻠﯩﻘﻼﺭﻏﺎ ﺋﯩﻘﺘﯩﺴﺎﺩﯨﻲ ﺑﯧﺴﯩﻢ، ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﺧﯩﺘﺎﻱ ﺯﯗﻟﻤﻰ، ﺧﯩﺘﺎﻳﻼﺭ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﯞﻩﻫﺸﯩﻴﻠﯩﻚ" ﺩﯦﮕﻪﻧﮕﻪ ﺋﻮﺧﺸﺎﺵ ﺗﯧﻤﯩﻼﺭ ﺋﺎﺳﺘﯩﺪﺍ ﺋﻪﺗﺮﺍﭘﻠﯩﻖ ﺋﺎﯕﻠﯩﺘﯩﻠﻐﺎﻥ." ﺗﯜﺭﻛﯩﺴﺘﺎﻥ ﮔﯧﺰﯨﺘﻰ ﺑﺎﺵ ﺗﻪﻫﺮﯨﺮﻯ ﺋﺎﻗﯩﻞ ﺟﺎﻣﺎﻝ ﺋﻪﭘﻪﻧﺪﻯ، ﺑﯘ ﻣﺎﻗﺎﻟﻪ ﺋﯧﻼﻥ ﻗﯩﻠﯩﻨﻐﺎﻧﺪﯨﻦ ﻛﯧﻴﯩﻦ، ﻧﯘﺭﻏﯘﻥ ﺋﺎﺯﻩﺭﺑﻪﻳﺠﺎﻧﻠﯩﻘﻼﺭﻧﯩﯔ ﮔﯧﺰﯨﺘﺨﺎﻧﯩﻐﺎ ﺗﯧﻠﯧﻔﻮﻥ ﻗﯩﻠﯩﭗ ﺗﻪﺑﺮﯨﻜﻠﯩﮕﻪﻧﻠﯩﻜﯩﻨﻰ ﺋﯧﻴﺘﺘﻰ. ﺑﯩﺰ ﺑﯘ ﻣﺎﻗﺎﻟﻪ ﯞﻩ ﺋﺎﯞﻏﯘﺳﺖ ﺋﯧﻴﻰ ﺋﯩﭽﯩﺪﻩ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﻳﯜﺯ ﺑﻪﺭﮔﻪﻥ ﯞﻩﻗﻪﻟﻪﺭ ﻫﻪﻗﻘﯩﺪﻩ ﺗﻪﭘﺴﯩﻠﯩﻲ ﻣﻪﻟﯘﻣﺎﺕ ﺋﯧﻠﯩﺶ ﺋﯜﭼﯜﻥ ﺗﯜﺭﻛﯩﺴﺘﺎﻥ ﮔﯧﺰﯨﺘﯩﻨﯩﯔ ﺑﺎﺵ ﺗﻪﻫﺮﯨﺮﻯ ﺋﺎﻗﯩﻞ ﺟﺎﻣﺎﻝ ﺋﻪﭘﻪﻧﺪﻯ ﺑﯩﻠﻪﻥ ﺗﯧﻠﯧﻔﻮﻥ ﺯﯨﻴﺎﺭﯨﺘﻰ ﺋﯧﻠﯩﭗ ﺑﺎﺭﺩﯗﻕ. ﺋﯘ ﺑﯩﺰ ﺑﯩﻠﻪﻥ ﺋﯧﻠﯩﭗ ﺑﺎﺭﻏﺎﻥ ﺳﯚﻫﺒﯩﺘﯩﺪﻩ ﻳﯧﻘﯩﻨﺪﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﺋﯘﻳﻐﯘﺭﻻﺭﻧﯩﯔ ﺧﯩﺘﺎﻳﻐﺎ ﻗﺎﺭﺷﻰ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﻫﻪﺭﯨﻜﻪﺗﻠﯩﺮﯨﻨﯩﯔ ﻣﯩﻠﻠﯩﻲ ﺋﺎﺯﺍﺩﻟﯩﻖ ﺋﯩﻨﻘﯩﻼﺑﻰ ﺋﯩﻜﻪﻧﻠﯩﻜﯩﻨﻰ، ﻫﻪﺭﮔﯩﺰﻣﯘ ﺑﻪﺯﻯ ﺩﯙﻟﻪﺗﻠﻪﺭﻧﯩﯔ ﺩﯦﮕﯩﻨﯩﺪﻩﻙ ﺗﯧﺮﺭﻭﺭ ﻫﻪﺭﯨﻜﯩﺘﻰ ﺋﻪﻣﻪﺳﻠﯩﻜﯩﻨﻰ ﺋﯧﻴﺘﺘﻰ. ﻫﯚﺭﻣﻪﺗﻠﯩﻚ ﺋﺎﻗﯩﻞ ﺟﺎﻣﺎﻝ ﺋﻪﭘﻪﻧﺪﻯ ﺗﯜﺭﻛﯩﺴﺘﺎﻥ ﮔﯧﺰﯨﺘﯩﺪﻩ ﺋﯘﻳﻐﯘﺭﻻﺭ ﻫﻪﻗﻘﯩﺪﻩ ﻧﯧﻤﻪ ﺧﻪﯞﻩﺭﻟﻪﺭ ﺋﯧﻼﻥ ﻗﯩﻠﯩﻨﺪﻯ؟ ﺩﯦﮕﻪﻥ ﺳﻮﺋﺎﻟﯩﻤﯩﺰﻏﺎ ﺋﯘ ﻣﯘﻧﺪﺍﻕ ﺟﺎﯞﺍﺏ ﺑﻪﺭﺩﻯ: "ﺗﯜﺭﻛﯩﺴﺘﺎﻥ ﮔﯧﺰﯨﺘﻰ 2 ﻳﯩﻠﺪﯨﻦ ﺑﯧﺮﻯ ﻧﻪﺷﺮ ﻗﯩﻠﯩﻨﯩﯟﺍﺗﯩﺪﯗ. ﺋﯩﻜﻜﻰ ﻳﯩﻠﺪﯨﻦ ﺑﯧﺮﻯ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻫﻪﻗﻘﯩﺪﻩ ﻧﯧﻤﻪ ﺧﻪﯞﻩﺭ ﺗﺎﭘﺴﺎﻕ ﺋﯧﻼﻥ ﻗﯩﻠﯩﺸﻘﺎ ﺗﯩﺮﯨﺸﺘﯘﻕ. ﻳﯧﻘﯩﻨﺪﯨﻦ ﺑﯧﺮﻯ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻫﻪﻗﻘﯩﺪﻩ ﺧﻪﯞﻩﺭﻟﻪﺭﻣﯘ ﻛﯚﭘﯩﻴﯩﺸﻜﻪ ﺑﺎﺷﻠﯩﺪﻯ. ﺑﯘ ﻳﯩﻞ ﺋﯩﭽﯩﺪﻩ ﺋﻪﺯﻩﺭﺑﻪﻳﺠﺎﻧﻠﯩﻖ ﻛﺎﺭﺧﺎﻧﯩﭽﯩﻼﺭﻧﯩﯔ ﺋﯜﺭﯛﻣﭽﯩﺪﻩ ﺋﯧﻠﯩﭗ ﺑﺎﺭﻏﺎﻥ ﺯﯨﻴﺎﺭﻩﺗﻠﯩﺮﻯ ﻫﻪﻗﻘﯩﺪﻩ ﺑﯩﺮ ﻗﺎﻧﭽﻪ ﻗﯧﺘﯩﻢ ﺧﻪﯞﻩﺭ ﺋﯧﻼﻥ ﻗﯩﻠﺪﯗﻕ. ﺋﺎﺯﻩﺭﺑﻪﻳﺠﺎﻥ ﺩﯙﻟﯩﺘﻰ ﻫﺎﺯﯨﺮ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﺑﯩﻠﻪﻥ ﺗﯩﺠﺎﺭﯨﻲ ﻣﯘﻧﺎﺳﯩﯟﯨﺘﯩﻨﻰ ﺗﻪﺭﻩﻗﻘﻰ ﻗﯩﻠﺪﯗﺭﯗﺷﻘﺎ ﺗﯩﺮﯨﺸﯩﯟﺍﺗﯩﺪﯗ. ﺋﯘﻧﯩﯖﺪﯨﻦ ﺑﺎﺷﻘﺎ ﺋﻪﺯﻩﺭﺑﻪﻳﺠﺎﻧﺪﺍ ﺋﯘﻳﻐﯘﺭﻻﺭﻧﻰ، ﺋﯘﻳﻐﯘﺭ ﺗﺎﺭﯨﺨﯩﻨﻰ ﺗﻮﻧﯘﺷﺘﯘﺭﯗﺵ ﺋﯜﭼﯜﻥ ﭼﻮﯓ ﻫﻪﺟﯩﻤﺪﯨﻜﻰ ﭼﺎﺗﻤﺎ ﻣﺎﻗﺎﻟﯩﻠﻪﺭﻧﻰ ﺋﯧﻼﻥ ﻗﯩﻠﺪﯗﻕ. ﻣﻪﺳﯩﻠﻪﻥ 2007 - ﻳﯩﻠﯩﺪﺍ ﺋﻪﺯﻩﺭﺑﻪﻳﺠﺎﻧﺪﺍ ﺗﻮﻧﯘﻟﻐﺎﻥ ﻳﺎﺯﻏﯘﭼﻰ ﯞﻩ ﺗﺎﺭﯨﺨﭽﻰ ﺋﺎﻳﺪﯨﻦ ﺋﻪﭘﻪﻧﺪﻯ ﻳﺎﺯﻏﺎﻥ "ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﯞﻩ ﻫﺎﺯﯨﺮﻗﻰ ﺧﯩﺘﺎﻳﻨﯩﯔ ﺷﯩﻤﺎﻟﯩﻲ ﺭﺍﻳﻮﻧﻰ" ﺗﯧﻤﯩﺴﯩﺪﺍ ﭼﺎﺗﻤﺎ ﻣﺎﻗﺎﻟﻪ ﺋﯧﻼﻥ ﻗﯩﻠﺪﯗﻕ. ﻫﻪﻣﻤﯩﻤﯩﺰﮔﻪ ﻣﻪﻟﯘﻡ ﺑﻮﻟﻐﯩﻨﯩﺪﻩﻙ 2008 - ﻳﯩﻠﻰ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﺧﯩﺘﺎﻳﺪﺍ ﺋﯚﺗﻜﯜﺯﯛﻟﮕﻪﻥ ﺑﻮﻟﻐﺎﭼﻘﺎ ﺩﯗﻧﻴﺎﻧﯩﯔ ﺩﯨﻘﻘﻪﺕ ﺋﯧﺘﯩﺒﺎﺭﻯ ﺧﯩﺘﺎﻳﻐﺎ ﺑﯘﺭﺍﻟﺪﻯ. ﺋﻪﺳﻠﯩﺪﻩ ﭘﯜﺗﯜﻥ ﺩﯗﻧﻴﺎ ﺧﻪﻟﻘﻰ ﺧﯩﺘﺎﻳﺪﺍ ﭘﻪﻗﻪﺗﻼ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﻠﯩﺮﯨﻨﻰ ﻛﯚﺭﯛﺷﻰ ﻛﯧﺮﻩﻙ ﺋﯩﺪﻯ. ﺋﻪﻣﻤﺎ ﺋﻮﻟﯩﻤﭙﯩﻚ ﺑﺎﺷﻠﯩﻨﯩﺸﺘﯩﻦ ﺑﯘﺭﯗﻥ ﺗﯩﺒﻪﺗﺘﻪ ﯞﻩﻗﻪﻟﻪﺭ ﺑﻮﻟﺪﻯ، ﺑﯘ ﺩﯗﻧﻴﺎ ﻣﻪﺗﺒﯘﺋﺎﺗﻠﯩﺮﯨﻨﯩﯔ ﺩﯨﻘﻘﯩﺘﯩﻨﻰ ﻗﻮﺯﻏﯩﺪﻯ. ﺋﻪﻣﻤﺎ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻣﻪﺳﯩﻠﯩﺴﻰ ﺩﺍﯞﺍﻣﻠﯩﻖ ﻫﺎﻟﺪﺍ ﺋﯩﻜﻜﯩﻨﭽﻰ ﭘﯩﻼﻧﻐﺎ ﭼﯜﺷﯜﭖ ﻗﺎﻟﺪﻯ. ﺋﻮﻟﯩﻤﭙﯩﻚ ﺟﻪﺭﻳﺎﻧﯩﺪﺍ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﺪﺍ ﻣﻪﻳﺪﺍﻧﻐﺎ ﻛﻪﻟﮕﻪﻥ ﯞﻩﻗﻪﻟﻪﺭ ﺧﯩﺘﺎﻳﺪﺍ ﺋﯘﺯﯗﻧﺪﯨﻦ ﺑﯧﺮﻯ ﺋﯧﺰﯨﻠﯩﯟﺍﺗﻘﺎﻥ ﺋﯘﻳﻐﯘﺭ ﺧﻪﻟﻘﯩﻨﯩﯖﻤﯘ ﺑﺎﺭﻟﯩﻘﯩﻨﻰ ﺩﯗﻧﻴﺎﻏﺎ ﺋﺎﺷﻜﺎﺭﯨﻠﯩﺪﻯ. ﺑﯩﺰﻣﯘ ﺋﯘﻳﻐﯘﺭﻻﺭﻧﯩﯔ ﻗﯧﺮﯨﻨﺪﯨﺸﻰ ﺑﻮﻟﯘﺵ ﺳﯜﭘﯩﺘﯩﻤﯩﺰ ﺑﯩﻠﻪﻥ ﺋﯘﻳﻐﯘﺭﻻﺭﻧﯩﯔ ﺑﯘ ﭘﻪﺭﻳﺎﺩﯨﻨﻰ ﺩﯗﻧﻴﺎ ﺟﺎﻣﺎﺋﻪﺗﭽﯩﻠﯩﻜﯩﮕﻪ ﺋﺎﯕﻠﯩﺘﯩﺸﻘﺎ ﺗﯩﺮﯨﺸﺘﯘﻕ. ﺑﯘ ﺳﻪﯞﻩﺏ ﺑﯩﻠﻪﻥ ﮔﯧﺰﯨﺘﯩﻤﯩﺰﺩﻩ ﻳﯘﻗﯩﺮﯨﻘﯩﺪﻩﻙ ﻣﺎﻗﺎﻟﯩﻠﻪﺭﻧﻰ ﺋﯧﻼﻥ ﻗﯩﻠﯩﯟﺍﺗﯩﻤﯩﺰ." ﮔﯧﺰﯨﺘﯩﻤﯩﺰﺩﻩ ﺋﯧﻼﻥ ﻗﯩﻠﯩﻨﻐﺎﻥ ﺑﯘ ﻣﺎﻗﺎﻟﯩﺪﻩ ﻧﯧﻤﯩﻠﻪﺭ ﺑﺎﻳﺎﻥ ﻗﯩﻠﯩﻨﻐﺎﻥ؟ 8 - ﺋﺎﻳﺪﺍ ﺋﯘﻳﻐﯘﺭ ﺩﯨﻴﺎﺭﯨﺪﺍ ﻣﻪﻳﺪﺍﻧﻐﺎ ﻛﻪﻟﮕﻪﻥ ﯞﻩﻗﻪﻟﻪﺭﮔﻪ ﺋﺎﺯﻩﺭﺑﻪﻳﺠﺎﻥ ﻣﻪﺗﺒﯘﺋﺎﺗﻠﯩﺮﻯ ﻳﻪﺭ ﺑﻪﺭﺩﯨﻤﯘ؟ ﺩﯦﮕﻪﻥ ﺳﻮﺋﺎﻟﯩﻤﯩﺰﻏﺎ ﺋﯘ ﻣﯘﻧﺪﺍﻕ ﺟﺎﯞﺍﺏ ﺑﻪﺭﺩﻯ: "ﺑﯘ ﻣﺎﻗﺎﻟﯩﺪﻩ ﺧﯩﺘﺎﻳﺪﺍ ﺋﯘﻳﻐﯘﺭﻻﺭﻧﯩﯔ ﻳﯧﻘﯩﻨﻘﻰ ﺯﺍﻣﺎﻥ ﺗﺎﺭﯨﺨﯩﻤﯩﺰﺩﺍ ﺑﯧﺸﯩﺪﯨﻦ ﺋﯚﺗﻜﯜﺯﮔﻪﻥ ﺋﺎﺯﺍﭘﻠﯩﻖ ﻳﻮﻟﻠﯩﺮﻯ ﯞﻩ ﺋﯘﻳﻐﯘﺭ ﻣﯩﻠﻠﻰ ﺋﺎﺯﺍﺩﻟﯩﻖ ﺋﯩﻨﻘﯩﻼﺑﻰ، ﺧﯩﺘﺎﻳﻼﺭﻧﯩﯔ ﺋﯘﻳﻐﯘﺭﻻﺭﻏﺎ ﻗﺎﺭﺷﻰ ﺋﯧﻠﯩﭗ ﺑﺎﺭﻏﺎﻥ ﯞﻩﻫﺸﯩﻠﯩﻜﻠﯩﺮﻯ ﺑﺎﻳﺎﻥ ﻗﯩﻠﯩﻨﻐﺎﻥ. ﻣﺎﻗﺎﻟﯩﻨﯩﯔ ﺋﺎﺧﯩﺮﯨﺪﺍ ﭘﯜﺗﯜﻥ ﺗﯜﺭﻛﯩﻲ ﻣﯩﻠﻠﻪﺗﻠﻪﺭﻧﻰ ﺋﯘﻳﻐﯘﺭﻻﺭﻏﺎ ﻳﺎﺭﺩﻩﻡ ﻗﯩﻠﯩﺸﻘﺎ ﭼﺎﻗﯩﺮﺩﯗﻕ. 4 - ﺋﺎﯞﻏﯘﺳﺖ ﻗﻪﺷﻘﻪﺭ ﯞﻩﻗﻪﺳﯩﮕﻪ، ﻛﯘﭼﺎﺭ ﯞﻩﻗﻪﺳﯩﮕﻪ ﺋﺎﺯﻩﺭﺑﻪﻳﺠﺎﻥ ﻣﻪﺗﺒﯘﺋﺎﺗﻠﯩﺮﯨﻤﯘ ﻳﻪﺭ ﺑﻪﺭﺩﻯ، ﺋﻪﻣﻤﺎ ﺑﻪﺯﻯ ﻣﻪﺗﺒﯘﺋﺎﺗﻼﺭ ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﯨﺪﯨﻦ ﭘﺎﻳﺪﯨﻠﯩﻨﯩﭗ ﺑﻪﺭﮔﻪﻥ ﺑﻮﻟﻐﺎﭼﻘﺎ ﺗﯧﺮﺭﻭﺭ ﯞﻩﻗﻪﺳﻰ ﺩﯦﺪﻯ. ﺋﻪﺳﻠﯩﺪﻩ ﺗﯜﺭﻛﯩﻴﻪ، ﺋﺎﺯﻩﺭﺑﻪﻳﺠﺎﻥ ﯞﻩ ﺑﺎﺷﻘﺎ ﺗﯜﺭﻛﯩﻲ ﺟﯘﻣﻬﯘﺭﯨﻴﻪﺗﻠﯩﺮﯨﻨﯩﯔ ﻣﻪﺗﺒﯘﺋﺎﺗﻠﯩﺮﻯ ﺑﯘ ﯞﻩﻗﻪﻟﻪﺭ ﻫﻪﻗﻘﯩﺪﻩ ﻣﯘﺳﺘﻪﻗﯩﻞ ﺑﯩﺘﻪﺭﻩﭖ ﺧﻪﯞﻩﺭ ﺑﯧﺮﯨﺸﻰ ﻛﯧﺮﻩﻙ ﺋﯩﺪﻯ. ﺧﯩﺘﺎﻳﻼﺭ ﺋﯘﻳﻐﯘﺭﻻﺭﻧﻰ ﺗﯧﺮﺭﻭﺭﭼﻰ ﺩﻩﭖ ﺋﻪﻳﯩﺒﻠﯩﺴﻪ، ﺑﯩﺰﻣﯘ ﺋﯘ ﺧﻪﯞﻩﺭﻧﻰ ﻛﯚﭼﯜﺭﯛﭖ ﺋﯧﻠﯩﭗ ﺑﻪﺭﺳﻪﻙ ﺑﻮﻟﻤﺎﻳﺪﯗ." ﺳﯩﻠﻪﺭ 2 ﻳﯩﻠﺪﯨﻦ ﺑﯧﺮﻯ ﮔﯧﺰﯨﺘﯩﯖﻼﺭﺩﺍ ﺋﯘﻳﻐﯘﺭﻻﺭ ﻫﻪﻗﻘﯩﺪﻩ ﺧﻪﯞﻩﺭ ﺋﯧﻼﻥ ﻗﯩﻠﯩﯟﺍﺗﯩﺴﯩﻠﻪﺭ، ﺑﯘ ﺧﻪﯞﻩﺭﻟﻪﺭﮔﻪ ﻛﯩﺸﯩﻠﻪﺭﻧﯩﯔ ﺋﯩﻨﻜﺎﺳﻰ ﻗﺎﻧﺪﺍﻕ؟ ﺩﯦﮕﻪﻥ ﺳﻮﺋﺎﻟﯩﻤﯩﺰﻏﺎ ﺋﯘ ﻣﯘﻧﺪﺍﻕ ﺟﺎﯞﺍﺏ ﺑﻪﺭﺩﻯ: "ﺑﯩﺰ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻫﻪﻗﻘﯩﺪﻩ ﻧﯧﻤﻪ ﺧﻪﯞﻩﺭ ﺑﻮﻟﺴﺎ ﺑﯧﺮﯨﯟﺍﺗﯩﻤﯩﺰ. ﺑﯘ ﻣﺎﻗﺎﻟﯩﺪﯨﻦ ﻛﯧﻴﯩﻦ ﮔﯧﺰﯨﺘﯩﻤﯩﺰﮔﻪ ﺗﯧﻠﯧﻔﻮﻥ ﻗﯩﻠﻐﺎﻧﻼﺭ ﺑﻮﻟﺪﻯ، ﻧﯘﺭﻏﯘﻥ ﻛﯩﺸﯩﻠﻪﺭﺩﯨﻦ ﺧﻪﺗﻤﯘ ﻛﻪﻟﺪﻯ. ﺋﯘﻻﺭ ﺧﯧﺘﯩﺪﻩ، ﺳﯩﻠﻪﺭ ﺗﯜﺭﻛﯩﺴﺘﺎﻥ ﮔﯧﺰﯨﺘﯩﺪﻩ ﺑﯘ ﻣﺎﻗﺎﻟﯩﻨﻰ ﺋﯧﻼﻥ ﻗﯩﻠﻐﺎﻧﺪﯨﻦ ﻛﯧﻴﯩﻦ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺧﻪﻟﻘﯩﻨﯩﯔ ﻫﺎﺯﯨﺮﻗﻰ ﺋﻪﻫﯟﺍﻟﯩﻨﻰ ﭼﯜﺷﻪﻧﺪﯗﻕ ﺩﻩﭖ ﻳﯧﺰﯨﭙﺘﯘ. ﺑﯘﻧﯩﯖﺪﯨﻦ ﺋﺎﺯﻩﺭﺑﻪﻳﺠﺎﻥ ﺧﻪﻟﻘﯩﻨﯩﯔ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻨﯩﯔ ﻫﺎﺯﯨﺮﻗﻰ ﯞﻩﺯﯨﻴﯩﺘﻰ ﻫﻪﻗﻘﯩﺪﻩ ﺧﻪﯞﻩﺭﺩﺍﺭ ﺋﻪﻣﻪﺳﻠﯩﻜﯩﻨﻰ ﻛﯚﺭﯛﯞﺍﻻﻻﻳﻤﯩﺰ." ﻫﯚﺭﻣﻪﺗﻠﯩﻚ ﺋﺎﻗﯩﻞ ﺟﺎﻣﺎﻝ ﺋﻪﭘﻪﻧﺪﻯ ﺳﯩﺰﻣﯘ ﺩﻩﭖ ﺋﯚﺗﻜﻪﻧﺪﻩﻙ، ﺋﺎﯞﻏﯘﺳﺖ ﺋﯧﻴﻰ ﺋﯩﭽﯩﺪﻩ ﻗﻪﺷﻘﻪﺭ ﯞﻩ ﻛﯘﭼﺎﻻﺭﺩﺍ ﺧﯩﺘﺎﻱ ﺋﺎﻣﺎﻧﻠﯩﻖ ﺳﺎﻗﻼﺵ ﺧﺎﺩﯨﻤﻠﯩﺮﯨﻐﺎ ﻫﯘﺟﯘﻡ ﻗﯩﻠﯩﺶ ﯞﻩﻗﻪﻟﯩﺮﻯ ﻣﻪﻳﺪﺍﻧﻐﺎ ﻛﻪﻟﺪﻯ، ﺳﯩﺰ ﺑﯘﻧﯩﯖﻐﺎ ﻗﺎﻧﺪﺍﻕ ﻗﺎﺭﺍﻳﺴﯩﺰ؟ ﺩﯦﮕﻪﻥ ﺳﻮﺋﺎﻟﯩﻤﯩﺰﻏﺎ ﺋﯘ ﻣﯘﻧﺪﺍﻕ ﺟﺎﯞﺍﺏ ﺑﻪﺭﺩﻯ: " ﺋﯘﻳﻐﯘﺭ ﺗﯜﺭﻛﻠﯩﺮﻯ ﺋﯧﻠﯩﭗ ﺑﺎﺭﻏﺎﻥ ﺑﯘ ﻫﯘﺟﯘﻣﻼﺭ ﻫﯚﻛﯜﻣﻪﺕ ﺧﺎﺩﯨﻤﻠﯩﺮﯨﻐﺎ ﻗﺎﺭﺷﻰ ﺋﯧﻠﯩﭗ ﺑﯧﺮﯨﻠﻐﺎﻥ ﺑﻮﻟﯘﭖ، ﭼﺎﺭﯨﺴﯩﺰﻟﯩﻘﻨﯩﯔ ﺋﯩﭙﺎﺩﯨﺴﻰ. ﺗﯜﺭﻛﯩﻲ ﻣﯩﻠﻠﻪﺗﻠﻪﺭ ﺩﯗﻧﻴﺎﻧﯩﯔ ﻧﯘﺭﻏﯘﻥ ﻳﻪﺭﻟﯩﺮﯨﺪﻩ، ﻣﻪﺳﯩﻠﻪﻥ ﻗﺎﺭﺍﺑﺎﻏﺪﺍ، ﻛﻪﺭﻛﯜﻛﺘﻪ، ﺭﯗﺳﯩﻴﯩﺪﻩ ﺋﯧﺰﯨﻠﯩﯟﺍﺗﯩﺪﯗ. ﺋﻪﻣﻤﺎ ﺗﯜﺭﻙ ﺩﯗﻧﻴﺎﺳﯩﺪﺍ ﺩﯙﻟﻪﺕ ﺗﯜﺯﯛﻣﯩﮕﻪ، ﻫﺎﻛﯩﻤﯩﻴﻪﺗﻜﻪ ﻗﺎﺭﺷﻰ ﻗﻮﺭﺍﻟﻠﯩﻖ ﻛﯚﺭﻩﺵ ﻗﯩﻠﯩﯟﺍﺗﻘﺎﻧﻼﺭ ﭘﻪﻗﻪﺗﻼ ﺋﯘﻳﻐﯘﺭﻻﺭ. ﺑﯘ ﻛﯩﺸﯩﻨﯩﯔ ﻗﺎﺗﺘﯩﻖ ﺩﯨﻘﻘﯩﺘﯩﻨﻰ ﻗﻮﺯﻏﺎﻳﺪﯗ. ﺑﯩﺰ ﺋﯘﻳﻐﯘﺭ ﻗﯧﺮﯨﻨﺪﺍﺷﻠﯩﺮﯨﻤﯩﺰﻧﯩﯔ ﺑﯘ ﻣﯘﺟﺎﺩﯨﻠﯩﺴﯩﻨﻰ ﺩﯗﻧﻴﺎﻏﺎ ﻣﯩﻠﻠﻰ ﺋﺎﺯﺍﺩﻟﯩﻖ ﻛﯜﺭﯨﺸﻰ ﺩﻩﭖ ﺋﺎﯕﻠﯩﺘﯩﺸﯩﻤﯩﺰ ﻛﯧﺮﻩﻙ. ﺑﯘ ﺋﯧﺰﯨﻠﮕﻪﻥ ﺑﯩﺮ ﻣﯩﻠﻠﻪﺗﻨﯩﯔ ﻣﯩﻠﻠﻰ ﺋﺎﺯﺍﺩﻟﯩﻖ ﺋﯩﻨﻘﯩﻼﯞﯨﺪﯗﺭ."
No comments:
Post a Comment