7 - ﺋﯚﻛﺘﻪﺑﯩﺮ ﺋﺎﻣﯧﺮﯨﻜﺎ ﯞﺍﺷﯩﻨﮕﺘﻮﻥ ﺭﺍﻳﻮﻧﻠﯘﻕ ﺳﻮﺕ ﻣﻪﻫﻜﯩﻤﯩﺴﻰ ﺳﻮﺩﯨﻴﯩﺴﻰ ﺭﯨﭽﺎﺭﺩﻭ ﺋﯘﺭﺑﯩﻨﺎ ﺋﻪﭘﻪﻧﺪﻯ، ﮔﯘﻩﻧﺘﺎﻧﺎﻣﻮ ﺋﯘﻳﻐﯘﺭ ﺗﯘﺗﻘﯘﻧﻠﯩﺮﯨﻨﻰ ﺩﻩﺭﻫﺎﻝ ﻗﻮﻳﯘﯞﯦﺘﯩﺶ ﺑﯘﻳﺮﯗﻗﯩﻨﻰ ﭼﯩﻘﺎﺭﻏﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﻣﻪﺯﻛﯘﺭ ﺑﯘﻳﺮﯗﻕ ﺗﯜﻧﯜﮔﯜﻥ ﻛﻪﭼﻘﯘﺭﯗﻥ ﺋﺎﻣﯧﺮﯨﻜﺎ ﺋﻪﺩﻟﯩﻴﻪ ﻣﯩﻨﯩﺴﺘﯩﺮﻟﯩﻜﻰ ﺗﻪﺭﯨﭙﯩﺪﯨﻦ ﯞﺍﻗﯩﺘﻠﯩﻖ ﺗﻮﺧﺘﯩﺘﯩﭗ ﻗﻮﻳﯘﻟﺪﻯ.
7 - ﺋﯚﻛﺘﻪﺑﯩﺮ ﺋﻪﺗﯩﮕﻪﻥ ﺳﺎﺋﻪﺕ ﺋﻮﻧﺪﺍ، ﺋﺎﻣﯧﺮﯨﻜﺎ ﻓﯧﺪﯦﺮﺍﺗﺴﯩﻴﻪ ﺳﻮﺕ ﻣﻪﻫﻜﯩﻤﯩﺴﯩﺪﻩ ﺳﻮﺩﯨﻴﻪ ﺭﯨﭽﺎﺭﺩﻭ ﺋﯘﺭﺑﯩﻨﺎ ﺋﻪﭘﻪﻧﺪﻯ ﺋﯘﻳﻐﯘﺭ ﺗﯘﺗﻘﯘﻧﻼﺭﻧﯩﯔ ﺋﺎﻣﯧﺮﯨﻜﯩﻐﺎ ﺩﻩﺭﻫﺎﻝ ﻗﻮﻳﯘﭖ ﺑﯧﺮﯨﻠﯩﺸﻰ ﻛﯧﺮﻩﻛﻠﯩﻜﻰ ﻫﻪﻗﻘﯩﺪﻩ ﺑﯘﻳﺮﯗﻕ ﭼﯜﺷﯜﺭﺩﻯ. ﺳﯜﺭﻩﺕ، ﺋﺎﻣﯧﺮﯨﻜﺎ ﻓﯧﺪﯦﺮﺍﺗﺴﯩﻴﻪ ﺳﻮﺕ ﻣﻪﻫﻜﯩﻤﯩﺴﯩﻨﯩﯔ ﺑﯩﻨﺎﺳﻰ.
ﻣﻪﻟﯘﻡ ﺑﻮﻟﯘﺷﯩﭽﻪ، ﺑﯘﺵ ﻫﯚﻛﯜﻣﯩﺘﻰ ﯞﻩ ﻫﯚﻛﯜﻣﻪﺕ ﺋﺎﺩﯞﯗﻛﺎﺗﻠﯩﺮﻯ ﺳﻮﺩﯨﻴﻪ ﺋﯘﺭﺑﯩﻨﺎ ﺋﻪﭘﻪﻧﺪﯨﻨﯩﯔ ﻣﻪﺯﻛﯘﺭ ﻗﺎﺭﺍﺭﻯ ﺋﯜﺳﺘﯩﺪﯨﻦ ﺋﺎﻣﯧﺮﯨﻜﺎ ﺋﻪﺭﺯﯨﻴﻪﺕ ﺳﻮﺗﯩﻐﺎ ﺋﻪﺭﺯ ﺳﯘﻧﻐﺎﻥ ﺑﻮﻟﯘﭖ، ﻧﻪﺗﯩﺠﯩﺪﻩ ﺋﯜﭺ ﻧﻪﭘﻪﺭ ﺳﻮﺩﯨﻴﻪ ﺑﯩﺮﻟﯩﻜﺘﻪ ﻣﻪﺯﻛﯘﺭ ﺑﯘﻳﺮﯗﻗﻨﻰ " ﻣﻪﻣﯘﺭﯨﻲ ﺟﻪﻫﻪﺗﺘﯩﻦ ﺗﻮﺧﺘﯩﺘﯩﭗ ﻗﻮﻳﯘﺵ" ﻗﺎﺭﺍﺭﻯ ﭼﯩﻘﺎﺭﻏﺎﻥ.
7 - ﺋﯚﻛﺘﻪﺑﯩﺮ ﺳﻮﺩﯨﻴﻪ ﺋﯘﺭﺑﯩﻨﺎ ﺋﻪﭘﻪﻧﺪﻯ ﻫﯚﻛﯜﻣﻪﺕ ﺗﺎﺭﻣﺎﻗﻠﯩﺮﯨﻐﺎ ﮔﯜﺋﺎﻧﺘﺎﻧﺎﻣﻮﺩﯨﻜﻰ 17 ﻧﻪﭘﻪﺭ ﺋﯘﻳﻐﯘﺭﻧﻰ 10 - ﺋﯚﻛﺘﻪﺑﯩﺮ ﺟﯜﻣﻪ ﻛﯜﻧﻰ ﺋﯚﺯ ﺳﻮﺗﺨﺎﻧﯩﺴﯩﻐﺎ ﻫﺎﺯﯨﺮ ﻗﯩﻠﯩﺶ ﻛﯧﺮﻩﻛﻠﯩﻜﯩﻨﻰ ﻫﻪﻣﺪﻩ ﺋﯘﻻﺭﻧﯩﯔ ﻛﯧﻴﯩﻨﻜﻰ ﻣﻪﺳﯩﻠﯩﺴﯩﻨﻰ ﻣﯘﺷﯘ ﻳﻪﺭﺩﻩ ﺑﯩﺮ ﺗﻪﺭﻩﭖ ﻗﯩﻠﯩﺪﯨﻐﺎﻧﻠﯩﻘﯩﻨﻰ ﺑﯘﻳﺮﯗﻏﺎﻥ ﺋﯩﺪﻯ.
ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ ﻣﻪﺯﻛﯘﺭ ﻗﺎﺭﺍﺭﯨﻐﺎ ﻧﺎﺭﺍﺯﻯ
ﮔﯘﻩﻧﺘﺎﻧﺎﻣﻮ ﺋﯘﻳﻐﯘﺭ ﺗﯘﺗﻘﯘﻧﻠﯩﺮﯨﻨﻰ ﻗﻮﻳﯘﭖ ﺑﯧﺮﯨﺶ ﺑﯘﻳﺮﯗﻗﻰ ﭼﯩﻘﯩﺮﯨﻠﻐﺎﻧﺪﯨﻦ ﻛﯩﻴﯩﻦ ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ ﯞﻩ ﺋﺎﻗﺴﺎﺭﺍﻱ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﺳﻮﺩﯨﻴﻪ ﺋﯘﺭﺑﯩﻨﺎ ﺋﻪﭘﻪﻧﺪﯨﻨﯩﯔ ﻣﻪﺯﻛﯘﺭ ﻗﺎﺭﺍﺭﯨﻐﺎ ﻧﺎﺭﺍﺯﯨﻠﯩﻖ ﺑﯩﻠﺪﯛﺭﺩﻯ ﯞﻩ ﻣﻪﺯﻛﯘﺭ ﻗﺎﺭﺍﺭﻧﯩﯔ " ﺋﺎﻣﯧﺮﯨﻜﯩﻨﯩﯔ ﻗﺎﻧﯘﻧﯩﻐﺎ ﺧﯩﻼﭖ" ﺋﯩﻜﻪﻧﻠﯩﮕﯩﻨﻰ ﯞﻩ ﺑﯘ ﺧﯩﻠﯩﺪﯨﻜﻰ ﻗﺎﺭﺍﺭﻏﺎ ﻳﻮﻝ ﻗﻮﻳﯘﻟﺴﺎ ﮔﯘﺋﺎﻧﺘﺎﻧﺎﻣﻮﺩﯨﻜﻰ ﺑﺎﺷﻘﺎ ﺗﯘﺗﻘﯘﻧﻼﺭﻧﯩﯔ ﺋﻮﺧﺸﺎﺵ ﯞﺍﺳﯩﺘﯩﻠﻪﺭﻧﻰ ﺗﺎﻟﻠﯩﺸﯩﻐﺎ ﻳﻮﻝ ﺋﯧﭽﯩﭗ ﺑﯧﺮﯨﺪﯨﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﺩﻯ.ﺋﺎﻗﺴﺎﺭﺍﻱ ﺋﺎﺧﺒﺎﺭﺍﺕ ﺋﯩﺸﺨﺎﻧﯩﺴﻰ ﻛﺎﺗﯩﭙﻰ ﺩﺍﻧﺎ ﭘﯧﺮﯨﻨﻮ ﺋﯧﻼﻥ ﻗﯩﻠﻐﺎﻥ ﻣﻪﺯﻛﯘﺭ ﺑﺎﻳﺎﻧﺎﺗﺘﺎ: " ﺋﯚﺯ ﭘﯘﻗﺮﺍﻟﯩﺮﯨﻤﯩﺰﻧﯩﯔ ﻫﻪﻣﺪﻩ ﻣﻪﺯﻛﯘﺭ ﺋﯘﻳﻐﯘﺭﻻﺭﻧﯩﯔ ﺑﯩﺨﻪﺗﻪﺭﻟﯩﻜﯩﻨﻰ ﻛﯚﺯﺩﻩ ﺗﯘﺗﯘﭖ، ﺋﺎﻣﯧﺮﯨﻜﺎ ﻗﻮﺷﻤﺎ ﺷﯩﺘﺎﺗﻠﯩﺮﻯ ﺑﯘ ﻛﯩﺸﯩﻠﻪﺭﻧﻰ ﻗﻮﺑﯘﻝ ﻗﯩﻠﯩﺪﯨﻐﺎﻥ ﺩﯙﻟﻪﺕ ﺗﯧﭙﯩﺸﻘﺎ ﻫﻪﺭﯨﻜﻪﺕ ﻗﯩﻠﯩﺸﻨﻰ ﺩﺍﯞﺍﻣﻼﺷﺘﯘﺭﯨﺪﯗ" ﺩﯦﻴﯩﻠﮕﻪﻥ.
ﺟﺎﻣﯩﻞ ﺟﻪﻓﻔﺎﺭ:" ﺑﯘ ﮔﯘﺋﺎﻧﺘﺎﻧﺎﻣﻮ ﻻﮔﯧﺮﯨﻨﯩﯔ ﻗﺎﻧﯘﻧﯩﻲ ﺋﺎﺳﺎﺳﯩﻐﺎ ﺑﯧﺮﯨﻠﮕﻪﻥ ﺋﺎﮔﺎﻫ"
ﺋﻪﻣﻤﺎ ﺑﻪﺯﻯ ﻗﺎﻧﯘﻧﺸﯘﻧﺎﺱ ﻣﯘﺗﻪﺧﻪﺳﺴﯩﺴﻠﻪﺭﻧﯩﯔ ﺳﻮﺩﯨﻴﻪ ﺋﯘﺭﺑﯩﻨﺎ ﺋﻪﭘﻪﻧﺪﯨﻨﯩﯔ ﻗﺎﺭﺍﺭﯨﻐﺎ ﺑﻪﺭﮔﻪﻥ ﺑﺎﻫﺎﺳﻰ ﺑﺎﺷﻘﯩﭽﻪ ﺑﻮﻟﯘﭖ، ﺋﺎﺳﯩﻴﺎ ﯞﺍﻗﯩﺖ ﮔﯧﺰﯨﺘﯩﺪﻩ ﻧﻪﻗﯩﻞ ﻗﯩﻠﯩﻨﯩﺸﯩﭽﻪ، ﺋﺎﻣﯧﺮﯨﻜﺎ ﺋﺎﯞﺍﻡ ﺋﻪﺭﻛﯩﻨﻠﯩﻜﻰ ﺋﯩﺘﺘﯩﭙﺎﻗﻰ ﺩﯙﻟﻪﺕ ﺑﯩﺨﻪﺗﻪﺭﻟﯩﻜﻰ ﭘﺮﻭﮔﺮﺍﻣﻤﯩﺴﯩﻨﯩﯔ ﺩﯨﺮﯦﻜﺘﻮﺭﻯ ﺟﺎﻣﯩﻞ ﺟﻪﻓﻔﺎﺭ:"ﺑﯘ ﺑﯘﺵ ﻫﯚﻛﯜﻣﯩﺘﯩﻨﯩﯔ ﻫﯧﭽﻘﺎﻧﺪﺍﻕ ﻗﺎﻧﯘﻧﯩﻲ ﺋﺎﺳﺎﺳﻰ ﺑﻮﻟﻤﯩﻐﺎﻥ ﮔﯘﻩﻧﺘﺎﻧﺎﻣﻮ ﺳﯩﻴﺎﺳﯩﺘﯩﮕﻪ ﻗﺎﺭﺷﻰ ﭼﯩﻘﯩﺮﯨﻠﻐﺎﻥ ﺑﯩﺮ ﺩﻩﯞﻩﺭ ﺑﯚﻟﮕﯜﭺ ﻗﺎﺭﺍﺭﺩﯗﺭ. ﻫﺎﺯﯨﺮ ﮔﯘﺋﺎﻧﺘﺎﻧﺎﻣﻮﺩﯨﻜﻰ ﺋﯘﻳﻐﯘﺭﻻﺭ ﺩﯗﭺ ﻛﯧﻠﯩﯟﺍﺗﻘﺎﻥ ﺭﯨﺌﺎﻟﻠﯩﻖ ﮔﯘﺋﺎﻧﺘﺎﻧﺎﻣﻮ ﻻﮔﯧﺮﯨﻨﯩﯔ ﺋﻪﺧﻼﻗﻰ ﯞﻩ ﻗﺎﻧﯘﻧﯩﻲ ﺋﺎﺳﺎﺳﯩﻐﺎ ﺑﯧﺮﯨﻠﮕﻪﻥ ﺑﯩﺮ ﺋﺎﮔﺎﻫ" ﺩﯦﮕﻪﻥ ﻫﻪﻣﺪﻩ ﺳﻮﺩﯨﻴﻪ ﺋﯘﺭﺑﯩﻨﺎ ﺋﻪﭘﻪﻧﺪﯨﻨﯩﯔ ﺑﯘ ﻫﻪﻗﺘﯩﻜﻰ ﻗﺎﺭﺍﺭﯨﻨﯩﯔ ﺗﻮﻏﺮﺍ ﺋﯩﻜﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ.ﻣﻪﻟﯘﻡ ﺑﻮﻟﯘﺷﯩﭽﻪ، ﺋﻪﺭﺯﯨﻴﻪﺕ ﺳﻮﺗﯩﺪﺍ ﺑﯘ ﻫﻪﻗﺘﻪ ﺋﯧﻠﯩﭗ ﺑﯧﺮﯨﻠﻐﺎﻥ ﻣﯘﻧﺎﺯﯨﺮﯨﺪﻩ ﺋﯜﭺ ﺳﻮﺩﯨﻴﻪ ﺑﯩﺮﻟﯩﻜﺘﻪ ﻗﺎﺭﺍﺭ ﭼﯩﻘﯩﺮﯨﭗ ﺋﯘﻳﻐﯘﺭ ﺗﯘﺗﻘﯘﻧﻼﺭﻧﯩﯔ ﺋﺎﻣﯧﺮﯨﻜﯩﻐﺎ ﺋﯧﻠﯩﭗ ﻛﯧﻠﯩﻨﯩﺶ ﯞﺍﻗﺘﯩﻨﻰ ﻳﻪﻧﻪ ﺋﻪﯓ ﺋﺎﺯ ﺩﯦﮕﻪﻧﺪﯨﻤﯘ ﺑﯩﺮ ﻫﻪﭘﺘﻪ ﺋﯘﺯﺍﺭﺗﯩﺶ ﻫﻪﻣﺪﻩ ﻣﯘﺷﯘ ﺟﻪﺭﻳﺎﻧﺪﺍ ﻫﻪﺭ ﺋﯩﻜﻜﻰ ﺗﻪﺭﻩﭖ ( ﻳﻪﻧﻰ ﻫﯚﻛﯜﻣﻪﺕ ﯞﻩ ﺋﯘﻳﻐﯘﺭ ﺗﯘﺗﻘﯘﻧﻼﺭ) ﺋﺎﺩﯞﻭﻛﺎﺗﻠﯩﺮﯨﻨﯩﯔ ﻳﻪﻧﯩﻤﯘ ﺋﯩﻠﮕﯩﺮﯨﻠﯩﮕﻪﻥ ﻫﺎﻟﺪﺍ ﻣﯘﻧﺎﺯﯨﺮﻩ ﺋﯧﻠﯩﭗ ﺑﯧﺮﯨﺸﯩﻐﺎ ﺷﺎﺭﺍﺋﯩﺖ ﻫﺎﺯﯨﺮﻻﺷﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ.
ﮔﯘﺋﺎﻧﺘﺎﻧﺎﻣﻮﺩﯨﻜﻰ ﺋﯘﻳﻐﯘﺭ ﺗﯘﺗﻘﯘﻧﻠﯩﺮﯨﻨﯩﯔ ﺋﺎﺩﯞﻭﻛﺎﺗﻰ ﺳﻪﻳﺒﯩﻦ ﯞﻩﻟﯧﺖ ﺋﻪﭘﻪﻧﺪﯨﻨﯩﯔ ﺑﯩﻠﺪﯛﺭﯛﺷﯩﭽﻪ، ﺋﯘﻳﻐﯘﺭ ﺗﯘﺗﻘﯘﻧﻠﯩﺮﯨﻨﯩﯔ ﻗﻮﻳﯘﭖ ﺑﯧﺮﯨﻠﯩﺸﯩﮕﻪ ﺳﺎﺋﻪﺗﻠﻪﺭ ﻗﺎﻟﻐﺎﻧﺪﺍ ﺋﯩﺸﻼﺭﺩﺍ ﺋﯚﺯﮔﯩﺮﯨﺶ ﻳﯜﺯ ﺑﻪﺭﮔﻪﻥ ﺑﻮﻟﯘﭖ، ﺋﻪﺳﻠﻰ ﺋﺎﻣﯧﺮﯨﻜﯩﻨﯩﯔ ﻗﺎﻧﯘﻥ ﺋﯩﺠﺮﺍ ﻗﯩﻠﻐﯘﭼﻰ ﺧﺎﺩﯨﻤﻠﯩﺮﻯ ﺋﯘﻳﻐﯘﺭﻻﺭﻧﻰ ﻗﻮﻳﯘﭖ ﺑﯧﺮﯨﺶ ﻫﯚﻛﯜﻣﻰ ﭼﯩﻘﯩﺮﯨﻠﯩﭗ ﺋﻪﺗﯩﺴﯩﻼ ﻳﻪﻧﻰ ﭼﺎﺭﺷﻪﻧﺒﻪ ﻛﯜﻧﻰ ﮔﯘﺋﺎﻧﺘﺎﻧﺎﻣﻮﻏﺎ ﻛﯧﻠﯩﭗ ﺑﻮﻟﻐﺎﻥ ﻫﻪﻣﺪﻩ ﺋﯘﻳﻐﯘﺭ ﺗﯘﺗﻘﯘﻧﻼﺭﻧﻰ ﭘﻪﻳﺸﻪﻧﺒﻪ ﻛﯜﻧﻰ ﺋﺎﻣﯧﺮﯨﻜﯩﻐﺎ ﺋﯧﻠﯩﭗ ﻣﯧﯖﯩﺸﻘﺎ ﺗﻪﻳﻴﺎﺭﻟﯩﻖ ﻛﯚﺭﮔﻪﻥ.
ﺋﺎﺩﯞﻭﻛﺎﺕ ﯞﻩﻟﯧﺖ ﺋﻪﭘﻪﻧﺪﯨﻨﯩﯔ ﻗﺎﺭﯨﺸﯩﭽﻪ، ﺋﯘﻳﻐﯘﺭ ﺗﯘﺗﻘﺎﻧﻼﺭﻧﯩﯔ ﻗﻮﻳﯘﭖ ﺑﯧﺮﯨﻠﯩﺶ ﻣﻪﺳﯩﻠﯩﺴﻰ ﺑﻪﻟﻜﯩﻢ ﻳﻪﻧﻪ ﺑﯩﺮ - ﺋﯩﻜﻜﻰ ﻫﻪﭘﺘﻪ ﻛﻪﻳﻨﯩﮕﻪ ﺳﯜﺭﯛﻟﯜﺷﻰ ﻣﯘﻣﻜﯩﻦ ﺋﯩﻜﻪﻥ.
ﺋﯘﻳﻐﯘﺭ ﺗﯘﺗﻘﯘﻧﻼﺭﻧﻰ ﺧﯩﺘﺎﻳﻼﺭ ﻗﺎﻳﺘﯘﺭﯗﭖ ﻛﯧﺘﯩﺸﻨﻰ ﺗﻪﻟﻪﭖ ﻗﯩﻠﻤﺎﻗﺘﺎ
ﺋﯘﻳﻐﯘﺭ ﺗﯘﺗﻘﯘﻧﻼﺭﻧﻰ ﺋﺎﻣﯧﺮﯨﻜﯩﺪﺍ ﻗﻮﻳﯘﯞﯦﺘﯩﺶ ﻗﺎﺭﺍﺭﻯ ﯞﺍﻗﺘﯩﻨﭽﻪ ﺗﻮﺧﺘﯩﺘﯩﭗ ﻗﻮﻳﯘﻟﻐﺎﻥ ﭘﻪﻳﺘﻠﻪﺭﺩﻩ،ﺧﯩﺘﺎﻱ ﺗﻪﺭﻩﭖ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ ﺑﯘ ﺋﯘﻳﻐﯘﺭﻻﺭﻧﻰ ﺋﯚﺯﻟﯩﺮﯨﮕﻪ ﻗﺎﻳﺘﯘﺭﯗﭖ ﺑﯧﺮﯨﺸﻨﻰ ﺗﻪﻟﻪﭖ ﻗﯩﻠﺪﻯ ﯞﻩ ﺧﯩﺘﺎﻱ ﺗﺎﺷﻘﻰ ﺋﯩﺸﻼﺭ ﺑﺎﻳﺎﻧﺎﺗﭽﯩﺴﻰ ﭼﯩﯔ ﮔﺎﯓ ﺑﯜﮔﯜﻥ ﺋﺎﺧﺒﺎﺭﺍﺕ ﺋﯧﻼﻥ ﻗﯩﻠﯩﺶ ﻳﯩﻐﯩﻨﯩﺪﺍ ﺋﯘﻳﻐﯘﺭ ﺗﯘﺗﻘﯘﻧﻠﯩﺮﯨﻨﻰ ﺗﯧﺮﺭﻭﺭﭼﯩﻼﺭ ﺩﻩﭖ ﺋﺎﺗﯩﺪﻯ ﻫﻪﻣﺪﻩ ﺑﯘﻻﺭﻧﻰ ﺧﯩﺘﺎﻳﻐﺎ ﻗﺎﻳﺘﯘﺭﯗﭖ ﻛﯧﻠﯩﺶ ﻣﻪﻳﺪﺍﻧﯩﻨﯩﯔ ﺋﯚﺯﮔﻪﺭﻣﯩﮕﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.ﺧﯩﺘﺎﻱ ﺗﺎﺷﻘﻰ ﺋﯩﺸﻼﺭ ﺑﺎﻳﺎﻧﺎﺗﭽﯩﺴﻰ ﻳﻪﻧﻪ، ﻫﺎﺯﯨﺮ ﺧﯩﺘﺎﻳﻨﯩﯔ ﻗﺎﻧﯘﻥ ﺑﯩﻠﻪﻥ ﺋﯩﺪﺍﺭﻩ ﻗﯩﻠﯩﻨﯩﺪﯨﻐﺎﻧﻠﯩﻘﯩﻨﻰ، ﺧﯩﺘﺎﻳﻨﯩﯔ ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﻰ ﺗﻪﻥ ﺟﺎﺯﺍﺳﯩﻐﺎ ﻗﺎﺭﺷﻰ ﺗﯘﺭﯗﺵ ﺋﻪﻫﺪﯨﻨﺎﻣﯩﺴﯩﮕﻪ ﺋﯩﻤﺰﺍ ﻗﻮﻳﻐﺎﻥ ﺩﯙﻟﻪﺕ ﺋﯩﻜﻪﻧﻠﯩﻜﯩﻨﻰ، ﺧﯩﺘﺎﻳﺪﺍ ﺗﻪﻥ ﺟﺎﺯﺍﺳﻰ ﻳﻮﻗﻠﯘﻗﯩﻨﻰ ﺋﯩﻠﮕﯩﺮﻯ ﺳﯘﺭﯗﭖ ﻣﻪﺯﻛﯘﺭ ﺋﯘﻳﻐﯘﺭﻻﺭ ﺧﯩﺘﺎﻳﻐﺎ ﻗﺎﻳﺘﯘﺭﯗﻟﺴﺎ ﺗﻪﻥ ﺟﺎﺯﺍﺳﯩﻐﺎ ﻳﻮﻟﯘﻗﻤﺎﻳﺪﯨﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ.
"ﺋﯘﻳﻐﯘﺭﻻﺭ ﺧﯩﺘﺎﻳﻐﺎ ﻗﺎﻳﺘﯘﺭﯗﻟﺴﺎ ﺋﯧﻐﯩﺮ ﺟﺎﺯﺍﻏﺎ ﺋﯘﭼﺮﺍﻳﺪﯗ "
ﻫﺎﻟﺒﯘﻛﻰ، ﯞﺍﺷﯩﻨﮕﺘﻮﻥ ﭘﻮﭼﺘﯩﺴﻰ ﮔﯧﺰﯨﺘﻰ ﺑﯘ ﻫﻪﻗﺘﻪ ﺑﯧﺮﯨﻠﮕﻪﻥ ﺑﺎﺷﻤﺎﻗﺎﻟﯩﺪﺍ، ﺋﺎﻣﯧﺮﯨﻜﺎ ﻫﻪﺭﺑﯩﻲ ﺩﺍﺋﯩﺮﯨﻠﯩﺮﻯ ﮔﯘﻩﻧﺘﺎﻧﺎﻣﻮ ﺋﯘﻳﻐﯘﺭ ﺗﯘﺗﻘﯘﻧﻠﯩﺮﯨﻨﻰ ﺋﻪﺳﻠﻰ 2003 - ﻳﯩﻠﯩﻼ ﻗﻮﻳﯘﭖ ﺑﯧﺮﯨﻠﯩﺪﯨﻐﺎﻧﻼﺭ ﻗﺎﺗﺎﺭﯨﻐﺎ ﻛﯩﺮﮔﯜﺯﮔﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﯘﻻﺭ ﺧﯩﺘﺎﻳﻐﺎ ﻗﺎﻳﺘﯘﺭﯗﻟﺴﺎ ﺋﯧﻐﯩﺮ ﺟﺎﺯﺍﻏﺎ ﺋﯘﭼﺮﺍﭖ ﻛﯧﺘﯩﺶ ﺗﻪﻫﺪﯨﺘﻰ ﺑﻮﻟﻐﺎﭼﻘﺎ ﻻﮔﯩﺮﺩﺍ ﺩﺍﯞﺍﻣﻠﯩﻖ ﻗﺎﻟﺪﯗﺭﯗﺷﻘﺎ ﻣﻪﺟﺒﯘﺭ ﺑﻮﻟﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ ﯞﻩ: " ﺑﯩﺰ ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺑﯘﺷﻨﯩﯔ ﺑﯘ ﻛﯩﺸﯩﻠﻪﺭﻧﯩﯔ ﺑﯩﺮ ﻗﯩﺴﻤﯩﻐﺎ ﭘﺎﻧﺎﻫﻠﯩﻖ ﺑﯧﺮﯨﺸﯩﻨﻰ ﺟﯩﺪﺩﯨﻲ ﺗﻪﻟﻪﭖ ﻗﯩﻠﯩﻤﯩﺰ. ﺋﻪﮔﻪﺭ ﺋﯘ ﺷﯘﻧﺪﺍﻕ ﻗﯩﻠﻐﺎﻥ ﺑﻮﻟﺴﺎ ﺋﯩﺪﻯ، ﺋﻪﺩﯨﻠﯩﻴﻪ ﺋﻮﺭﮔﺎﻧﻠﯩﺮﯨﻨﯩﯔ ﻣﯘﺩﺍﺧﯩﻠﻪ ﻗﯩﻠﯩﺸﯩﺪﯨﻦ ﺳﺎﻗﻠﯩﻨﯩﭗ ﻗﺎﻟﻐﺎﻥ ﺑﻮﻻﺭ ﺋﯩﺪﻯ" ﺩﻩﭖ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ.ﺑﺎﺵ ﻣﺎﻗﺎﻟﯩﺪﻩ ﻳﻪﻧﻪ، ﺋﺎﻣﯧﺮﯨﻜﺎ ﻫﯚﻛﯜﻣﯩﺘﯩﻨﯩﯔ ﺑﯘ ﺋﯘﻳﻐﯘﺭ ﺗﯘﺗﻘﯘﻧﻠﯩﺮﯨﻨﯩﯔ ﺋﺎﻟﻠﯩﻘﺎﭼﺎﻥ ﺩﯗﺷﻤﻪﻥ ﺟﻪﯕﭽﯩﺴﻰ ﺋﻪﻣﻪﺳﻠﯩﻜﯩﻨﻰ، ﺋﯘﻻﺭﻧﯩﯔ ﺋﺎﻣﯧﺮﯨﻜﯩﻨﯩﯔ ﺩﯙﻟﻪﺕ ﻣﻪﻧﭙﻪﺋﻪﺗﻰ ﯞﻩ ﺑﯩﺨﻪﺗﻪﺭﻟﯩﻜﯩﮕﻪ ﻗﺎﺭﯨﺘﺎ ﺯﯨﻴﺎﻥ ﺳﺎﻟﯩﺪﯨﻐﺎﻥ ﻏﻪﺭﯨﺰﻯ ﻳﻮﻗﻠﯘﻗﯩﻨﻰ ﺋﯩﺴﭙﺎﺗﻼﭖ ﭼﯩﻘﻘﺎﻧﻠﯩﻘﻰ ﺑﺎﻳﺎﻥ ﻗﯩﻠﯩﻨﯩﭗ "ﺑﯘ ﻛﯩﺸﯩﻠﻪﺭﻧﯩﯔ ﺋﺎﻟﻠﯩﺒﯘﺭﯗﻥ ﺷﯜﺑﻬﯩﺴﯩﺰ ﻫﺎﻟﺪﺍ ﻗﻮﻳﯘﭖ ﺑﯧﺮﯨﻠﯩﺸﻰ ﻛﯧﺮﻩﻙ ﺋﯩﺪﻯ" ﺩﯦﻴﯩﻠﮕﻪﻥ ﻫﻪﻣﺪﻩ ﺑﯘ ﺋﯘﻳﻐﯘﺭﻻﺭﻧﯩﯔ ﺑﯩﺮﺩﯨﻦ - ﺑﯩﺮ ﺩﯛﺷﻤﯩﻨﯩﻨﯩﯔ ﺋﺎﻣﯧﺮﯨﻜﺎ ﺋﻪﻣﻪﺱ ﺑﻪﻟﻜﻰ ﺧﯩﺘﺎﻱ ﺋﯩﻜﻪﻧﻠﯩﻜﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﯘﭖ، ﺑﯘﻻﺭﻧﯩﯔ ﺩﯗﺷﻤﻪﻧﻠﯩﻜﯩﻨﯩﯔ ﺗﯩﻎ ﺋﯘﭼﻰ ﺋﯚﺯﻟﯩﺮﻯ ﻛﻪﻟﮕﻪﻥ ﺧﯩﺘﺎﻱ، ﻳﻪﻧﻰ ﺋﯘﻳﻐﯘﺭﻻﺭﻧﻰ ﻗﻪﺑﯩﻬ ﺑﺎﺳﺘﯘﺭﯗﺵ ﺗﺎﺭﯨﺨﯩﻐﺎ ﺋﯩﮕﻪ ﺧﯩﺘﺎﻱ ﻫﯚﻛﯜﻣﯩﺘﯩﺪﯗﺭ" ﺩﻩﭖ ﻳﯧﺰﯨﻠﻐﺎﻥ.
ﺋﯘﻳﻐﯘﺭ ﺟﺎﻣﺎﺋﯩﺘﻰ ﺋﯚﺯ ﻫﺎﻣﯩﻴﻠﯩﻘﯩﻐﺎ ﺋﺎﻟﻤﺎﻗﭽﻰ
ﯞﺍﺷﯩﻨﮕﺘﻮﻥ ﭘﻮﭼﺘﯩﺴﻰ ﮔﯧﺰﯨﺘﯩﺪﻩ ﺑﯘ ﻫﻪﻗﺘﻪ ﺑﯧﺮﯨﻠﮕﻪﻥ ﻳﻪﻧﻪ ﺑﯩﺮ ﭘﺎﺭﭼﻪ ﺧﻪﯞﻩﺭﺩﻩ ﻛﯚﺭﺳﯩﺘﯩﻠﯩﺸﯩﭽﻪ، ﺋﺎﻣﯧﺮﯨﻜﺎ ﻫﯚﻛﯜﻣﯩﺘﻰ ﯞﻩ ﻫﻪﺭﺑﯩﻲ ﺩﺍﺋﯩﺮﯨﻠﯩﺮﻯ ﺗﻪﺭﯨﭙﯩﺪﯨﻦ ﺩﯗﺷﻤﻪﻥ ﺟﻪﯕﭽﻰ ﺋﻪﻣﻪﺱ ﺩﻩﭖ ﺑﯧﻜﯩﺘﯩﻠﮕﻪﻥ ﺑﯘ ﺋﯘﻳﻐﯘﺭﻻﺭﻧﻰ ﺧﯩﺘﺎﻳﻐﺎ ﻗﺎﻳﺘﯘﺭﯗﭖ ﺑﻪﺭﻣﻪﺳﻠﯩﻜﯩﺪﯨﻜﻰ ﺑﯩﺮﯨﺪﯨﻦ - ﺑﯩﺮ ﺳﻪﯞﻩﺏ ﺑﯘ ﺋﯘﻳﻐﯘﺭ ﺧﯩﺘﺎﻳﻐﺎ ﻗﺎﻳﺘﯘﺭﯗﻟﺴﺎ ﻗﯩﻴﻨﺎﺷﻘﺎ ﯞﻩ ﺗﻪﻥ ﺟﺎﺯﺍﺳﯩﻐﺎ ﺗﺎﺭﺗﯩﻠﯩﺶ ﺧﻪﺗﯩﺮﯨﮕﻪ ﻳﻮﻟﯘﻗﯩﺪﯨﻐﺎﻧﻠﯩﻘﯩﺪﺍ ﺋﯩﻜﻪﻥ.ﺧﻪﯞﻩﺭﺩﻩ ﻣﯘﻧﺪﺍﻕ ﻛﯚﺭﺳﯩﺘﯩﻠﮕﻪﻥ: " ﺑﯧﻴﺠﯩﯔ ﺩﺍﺋﯩﺮﯨﻠﯩﺮﻯ ﺋﯚﺯ ﺋﺎﻧﺎ ﯞﻩﺗﯩﻨﯩﻨﯩﯔ ﻣﯘﺳﺘﻪﻗﯩﻠﻠﯩﻘﻰ ﺋﯘﭼﯘﻥ ﻛﯜﺭﻩﺵ ﻗﯩﻠﯩﯟﺍﺗﻘﺎﻥ ﺑﯘ ﺋﯘﻳﻐﯘﺭﻻﺭﻧﻰ ﺗﯧﺮﺭﻭﺭﭼﯩﻼﺭ ﺩﻩﭖ ﻗﺎﺭﺍﻳﺪﯗ".
ﻫﺎﺯﯨﺮ ﮔﯘﻩﻧﺘﺎﻧﺎﻣﻮ ﻫﻪﺭﺑﯩﻲ ﺗﯜﺭﻣﯩﺴﯩﺪﻩ 17 ﻧﻪﭘﻪﺭ ﺋﯘﻳﻐﯘﺭ ﻗﺎﻣﺎﻟﻐﺎﻥ ﺑﻮﻟﯘﭖ، ﺋﻪﮔﻪﺭ ﺑﯘﻻﺭ ﺋﺎﻣﯧﺮﯨﻜﯩﻐﺎ ﻗﻮﻳﯘﭖ ﺑﯧﺮﯨﻠﺴﻪ، ﺋﺎﻣﯧﺮﯨﻜﺎ ﯞﺍﺷﯩﻨﮕﺘﻮﻥ ﺭﺍﻳﻮﻧﯩﺪﯨﻜﻰ ﺋﯘﻳﻐﯘﺭ ﺟﺎﻣﺎﺋﯩﺘﻰ ﺑﯘﻻﺭﻧﻰ ﺋﯚﺯ ﻫﺎﻣﯩﻴﻠﯩﻘﯩﻐﺎ ﺋﺎﻟﯩﺪﯨﻐﺎﻧﻠﯩﻘﻰ ﺋﯜﺳﺘﯩﺪﻩ ﯞﻩﺩﻩ ﺑﯧﺮﯨﺸﻜﻪﻥ ﻫﻪﻣﺪﻩ ﺋﺎﻣﯧﺮﯨﻜﯩﺪﯨﻜﻰ ﺑﻪﺯﻯ ﺋﯩﺠﺘﯩﻤﺎﺋﯩﻲ ﯞﻩ ﺋﯩﻨﺴﺎﻧﯩﻲ ﻳﺎﺭﺩﻩﻡ ﺗﻪﺷﻜﯩﻼﺗﻠﯩﺮﯨﻤﯘ ﺑﯘ ﺋﯘﻳﻐﯘﺭﻻﺭﻧﯩﯔ ﺗﯘﺭﻣﯘﺵ ﯞﻩ ﺟﻪﻣﺌﯩﻴﻪﺗﻜﻪ ﻣﺎﺳﻠﯩﺸﯩﺶ ﺋﯩﺸﻠﯩﺮﯨﻐﺎ ﻳﺎﺭﺩﻩﻣﺪﻩ ﺑﻮﻟﺪﯨﻐﺎﻧﻠﯩﻘﯩﻨﻰ ﺳﻮﺗﭽﯩﻐﺎ ﻳﻪﺗﻜﯜﺯﮔﻪﻥ ﺋﯩﺪﻯ.
No comments:
Post a Comment